CUMINUM

I.

CUMINUM

Insul. parva maris Siculi inter Melitam et Gaulum Insul. sub dominio Equitum Melitensium, ubi arx excitata a Vignacurtio Gallo, magno Magistro.

II.

CUMINUM

in embammatis locum habebat olim, quae ad ἐυςτομίαν parabantur, et os suave facere consuevêre. Quemadmodum Veteres agallochi quoque lignum eôdem fine mandebant et decoctô eiusdem os colluebant: hodieque lignô casiae utimur ad eundem usum. De illo Plin. l. 20. c. 12. extr.. Cuminum silvestre est praetenue, quaternis aut quinis foliis velut serratis. Sed et Sativo magnus usus, in stomachi praecipue remediis --- Veruntamen omnem pallorem bibentibus gignit. Hinc eius ad fraudes abusus. Pergit enim, Ita certe ferunt. Porcii Latronis clari inter Magistros dicendi adsectatores similitudinem coloris studiis contracti imitatos: et paulo ante, Iulium Vindicem adsertorem illum a Nerone libertatis, captatione testamenti sic lenocinatum. Nempe cum Vindicis, qui pro Praetore Galliam regebat, testamentum ac hereditatem Nero captaret; eius cupiditati et voluntati sic obsecutus ille est, ut frequenti cumini usu contractô pallore simularet, adversâ se valetudine premi, quâ brevi periturus esset: quâ arte et Neronem elusit bonis suis inhiantem, et insuper eius amicitiâ ac benevolentiâ summos honores assecutus est. Postmodum vero primus omnium, qui exercitibus praerent a Nerone defecit, Dalechampius Not. ad l.. De convicio κυμινοτρίςτου, Cumini sectoris, quô Hadrianus Caesar olim adspersus, res notissima. Non omittendus vero modus Cuminum excutiendi, Veteribus usitatus. Nempe cum Veteres quatuor modis grana excutere vel exterere consueverint, Iudaei debiliora semina, atque inter ea cuminum, virgis solum et flagellis, ex folliculis excusêre. Unde Hieronymus in Esai. Gith et cymnium, quae infirmiora sunt semina, non rotis plaustrorum teruntur --- sed vitgâ excutiuntur et baculô, quae vulgo flagella dicuntur: quae ex ipso Propheta sumpta, c. 28. v. 27. Graeci id ῥαβδίζειν dixêre. Vide Sam. Bochart. Hieroz. Part. prior. l. 2. c. 32. et infra ubi de Veterum Trituratione.